اپنی پسندیدہ فہرست میں شامل كریں

امریکی قانون کے تحت وزارت خارجہ میں مختلف ممالک کے بارے میں موجود خفیہ دستاویزات کو 25 سال بعد عوام کے مطالعے کے لئے اوپن کر دیا جاتا ہے۔ تا ہم ان رپورٹوں کی وجہ یہ نہیں۔ یہ امریکی رپورٹیں نومبر 1979ء میں تہران کے امریکی سفارت خانے پر ایرانی طلباء کے قبضے کے دوران برآمد ہوئی تھیں۔ اس وقت سے اب تک ان رپورٹوں کے بارے میں بہت کچھ منظر عام پر آتا رہا لیکن اصل متن کے ساتھ یہ رپورٹیں منظر عام پر نہ آ سکیں۔
تہران کا امریکی سفارت خانہ اس دور میں آئی سی اے کے علاقائی دفتر کے طور پر جاسوسی کا سب سے بڑ امرکز بن چکا تھا۔ چنانچہ ایرانی طلباء نے سفار ت خانے پر قبضہ کر کے سینکڑوں امریکیوں کو یرغمال بنا لیا اور دستاویزات پر قبضہ کر کے ہر چیز کو تمہس نہس کر دیا۔ یہ ٹاپ سیکرٹ رپورٹیں مختلف ممالک کے بارے میں تھیں۔ چنانچہ پاکستان کے بارے میں یہ رپورٹیں ایرانی حکومت نے اسلام آباد بھجوا دیں۔
ان رپورٹوں کے مطالعے سے آپ کو اندازہو گا کہ امریکہ ہر قسم کے حالات و واقعات سے باخبر رہنے کیلئے کس طرح پاکستان کی جاسوسی کر رہا ہے؟ ان رپوٹوں میں ان پاکستانیوں کا بھی تذکرہ ہے جو اپنے ضمیر کا سودا کر کے امریکی سفارت کاروں کو مختلف حساس اور اہم معاملات پر اطلاعات دیتے رہے۔ ان رپورٹوں سے یہ بھی پتہ چلتا ہے کہ بہت سے پاکستانی امریکی سفارتکاروں کیلئے کام کر رہے ہیں۔