مولانا الطا ف حسین حالی اردو شاعری،تنقید اور مضمون نگاری کا ایک اہم ترین اور رجحان ساز نام ہیں۔انہوں نے سرسید کے ساتھ مل کر مسلمانوں کی بیداری کے لیے ناقابل فراموش کردار کیا۔شاعری میں مسدس حالی ان کی یادگار تصنیف ہے جو مسلمانوں کے عروج و زوال کی منظوم داستان ہے۔شاعری کے علاوہ انہوں نے مقدمہ شعر و شاعری اور یادگار غالب جیسی کتابیں لکھ کر اردو ادب میں ایک گراں قدر اضافہ کیا۔یادگار غالب اپنی نوعیت کی اردو ادب کی تاریخ میں پہلی کتاب ہے کہ اس میں ایک شاعر کی شخصیت و فن کا تنقیدی مطا لعہ کیا گیا ہے۔حالی غالب کے پرستاروں،قدردانوں اورخوشہ چینوں میں تھے اورعہد غالب کے چشم دید گواہ بھی۔چنانچہ اس کتاب میں غالب کے بارے میں کئے گئے تجزیے نے بعد کے ناقدین کو غالب کے کام کو سمجھنے میں انتہائی اہم کردار ادا کیا۔اس کتاب سے غالب شناسی کی بنیاد پڑی۔غالب کے حالات و واقعات اور اس کے کلام اور اس کے پس پردہ محرکات کو سمجھنے کے لیے اس کتاب کا مطاکعہ اردو ادب کے طالب علوں کے لیے انتہائی مفید اور اہم ہو گا۔